دروس حياتية قاسية من 2019

صحيح يا جماعة كلنا من 2019 مش عارفين أيه اللي حصل وحصل ازاي. أحنا غمضنا عنينا في 2019 ولسه فاتحنها النهاردة. ولسه مش فاهمين أيه اللي حصل من 2019 لحد النهاردة. وتقريبا مش هنعرف. بس في نفس الوقت، كان في دروس كتير جدا ممكن نتعلمها من الفترة القصيرة دي. لأن مع أنها كانت فترة قصيرة بس كان فيها حكم وعبر ممكن تفيدنا في اللي جاي. في البلوج بوست ده هنتكلم عن 10 دروس حياتية قاسية من 2019.

1. انقذ نفسك بنفسك

وأول درس من الدروس دي هو انك تنقذ نفسك بنفسك. بعد كل اللي حصل، انت أكيد عرفت وفهمت وأتأكدت أن مفيش حد هيجي ينقذك. لازم تكون عرفت انك مهما كان صحابك كتير ودايرة معارفك واسعة، فأنت الشخص الوحيد اللي هيحل مشكلتك. حتى لو طلبت حد يساعد وحل مشكلتك، انت برضه اللي طلبت المساعدة من الأول. يعني مهما كان، لازم تعتمد على نفسك أولا وأخيرا. وليه تعتمد على حد يحل مشاكلك أساسا؟ اشتغل على نفسك اكتر وخليك مستعد وعندك القدرة انك تحل مشاكلك بنفسك بدون مساعدة خارجية. ولو قفلت معاك خالص اطلب المساعدة بس الأول حاول تحل مشاكلك بنفسك بس الاول حاول تحل مشاكلك بنفسك.

اصل كلنا مردومين تحت التراب وعايزين نحفر ونطلع بس انت عمال اساعد ناس ومش بتساعد نفسك، ده انت بتساعد ناس مش عايزين يطلعوا من تحت التراب اصلا، وبرضه مش بتساعد نفسك لما تبقى تحفر وتنقذ نفسك، ابقى فكر تنقذ الناس. ولازم تستخبى من الناس اللي عمالين يرموا رملة عشان تفضل مدفون.

2. اعرف ازاي وامتى تختفي

أكيد برضه انت دلوقتي عرفت أن اختفائك المفاجئ ملوش نفس التأثير اللي انت متخيله. صحابك مش بيلاحظوا اختفائك إلا فين وفين. لازم تكون عرفت كمان أن الاختفاء مش لازم يكون له مبرر ولا تفسير. بالعكس، الاختفاء مطلوب. مطلوب عشان تشتغل على نفسك في صمت، مطلوب عشان تبعد عن الدوشة والزحمة اللي بتستنزفك، مطلوب علشان تركز على تطوير نفسك واكتشافها. متقلقش، لسه الناس بتتخانق على اتفه الأسباب. ومع احترامي ليك، انت وجودك ملوش التأثير القوي في الأحداث على نطاق واسع، وانت هتستفاد اكتر لو ركزت على نفسك. يعني زي المقولة الخالدة ركز في الحاجات اللي تقدر تغيرها مش الحاجات اللي متقدرش تغيرها والشاطر يفهم الفرق.

يمكن كلامي صعب بس امتى هتعرف انك ملكش لازمة ورأيك ميسواش حاجة.  مش حوار يعني، انت عايز تحس انك مهم وليك تأثير وبيتهيألك ان فيه حد مهتم. اتعلم تستخدم الصمت، لأن كل ما بتتكلم اكتر بتخربها على نفسك اكتر. صدقني مش هي دي الحاجة اللي هتظبط مزاجك، دي جرعة مزيفة من الاهتمام. اهتم بنفسك، استحمى، واستغطى كويس وانت تبقى تمام. 

الشخص اللي في موقف ضعف هو اللي يبرر نفسه، انما الشخص اللي موقفه قوي مش محتاج يبرر حاجة. وانت موقفك قوي فمش لازم تلتفت لكل واحد يشكك فيك وفي نواياك لأنه عايز يطلع منك بأي كلام يستغله ضدك فيستفزك. بس انت مش لازم ترد اصلا ولا تشغل بالك خالص. اصل اللي عمل زي اللي معملش.

لا وفي الاخر بيطلعوك مريض نفسي عايز يتعالج. طيب ما كنت سكت من الاول وخليت افكارك دي لنفسك بدل ما تبقى سلاح ضدك.

وساعات كتير مجرد السكوت بيكون افضل 100 مرة من احلى كلام ممكن يتقال.

3. أتعلم تقول لأ

درس قاسي لما تعرف أن وجودك ملوش التأثير اللي كنت متخيله. بس الأصعب من كده انك تفضل طيب مع شخص انت عارف ومتأكد انه بيستغلك. انت حتى لو بتحب تعمل الخير، اعمله، أنا مش بقولك متعملش خير. بس خلي بالك من الناس اللي عايشة سفلئة على حسابك وبيستغلوا طيبتك دي. وأتعلم تقولهم لأ وتتأثر بدموعهم اللي هي اصلا دموع تماسيح. اختار حد يستحق المساعدة فعلا، اختار حد بيساعد نفسه ومحتاج مساعدتك. بس انك تساعد أي حد يقولك انه محتاج مساعدة، تبقى محتاج تقول لأ. علشان انت لما تساعد حد ميستحقش المساعدة انت بتحرم حد يستحق المساعدة فعلا.

انت ممكن يصعب عليك حد عادي ده انسانيا حتى بس انت مش لازم تساعده. ان حد يصعب عليك حاجة وانك تساعده حاجة تانية. في ناس مهنتهم انهم يستغلوا ضميرك علشان يستفادوا منك ماديا. مهنتهم حرفيا مش مجاز. شغلهم انهم يصعبوا عليك فتبقى عايز تساعدهم. طبيعي ان شخص يصعب عليك لانه انسان زيك. بس انك تساعده دي حاجة تانية. وصدقني معظم الناس المحتاجين فعلا بيتكسفوا اصلا يطلبوا مساعدة. بس انت ساعد ده وده على قد ما تقدر. حتى لو شفت حد بيبيع مناديل اشتري منه احسن ما بجد يقف على ناصية يبيع مخدرات. على الاقل بيحاول يعمل اي منظر مش قاعد عاطل ولا بيفكر يعمل مصيبة.

4. أتعود على الوحدة

في اسطورة بتقول ان لو ملكش صحاب من زمان، يبقى مينفعش يبقى عندك صحاب. دي اسطورة. ممكن تعمل صحاب جداد في اي وقت وهتحس انك تعرفهم من زمان عادي جدا. في اسطورة بتقول انك هتقابل نصك التاني في مكان مثالي وفي وقت مثالي وكل حاجة هتبقى مثالية. دي اسطورة. ممكن جدا تقابل حب حياتك وانت بتجيب حاجة من البقال او مسافر سويسرا.

الوحدة وانك تكون لوحدك، ممكن تبقى حاجة قاسية جدا لو انت مش متعود عليها. بس صدقني انت هتنجز كتير وانت لوحدك. في عالم مثالي، لازم كل اللي حواليك يكونوا بيحبوك وبينصحوك وبيدولك طاقة اجابية. بس أحنا مش في عالم مثالي. بالعكس، أحنا في عالم كله قسوة. المهم، لو مش هتلاقي الناس اللي تقدر وجودك في حياتهم، عيش لوحدك احسن لك. اشتغل على نفسك في صمت وخلي النتائج هي اللي تتكلم. سر النجاح الحقيقي لما تلاقي حواليك ناس عايزاك تنجح، وسر الفشل لما تبقى حواليك ناس هم نفسهم عبء عليك. فلو انت في موقف مضطر تتعامل مع الناس الtoxic، حاول انك تقلل التعامل معاهم على قد ما تقدر وتنعزل عنهم.

 ربنا خلق الناس بمستويات ذكاء مختلفة. ومش كل الناس بيشوفوا نفس كل حاجة بنفس الطريقة. وطبيعي يحصل تضارب. انت لو عايش طول حياتك في قرية وروحت المدينة هتشوف دنيا مختلفة واللي عايش حياته في المدينة لو راح قرية هيشوف حاجة تانية. انت عينك على اللي في ايد غيرك وشايف اللي معاك قليل وغيرك عينه علي في ايدك ومستكتره عليك كمان. انت عايز الناس تقبلك ولما يقبلوك بتكتشف انهم وحشين وانت بقيت زيهم.

متحاولش انك تنتمي الي اي مجموعة لمجرد الانتماء، ممكن تلاقي عدم الانسجام اصعب من الوحدة. الحياة بتمشي بصحاب ومن غير صحاب عادي جدا على فكرة. وهتفضل تشرح وتبرر وجهة نظرك علشان تقنع الناس وهم هيفضلوا مصدقين اللي عايزين يصدقوه ومش هيقتنعوا لو جبت 100 دليل. متتعبش نفسك وتموت نفسك علشان يحبوك، مش هيحبوك. هم اصلا دماغهم غير دماغك وتفكيرهم غير تفكيرك. وعمرك ما هتيجي على هواهم وعمرهم ما هيجوا على هواك. متضيعش عمرك وانت بتحاول ترضي ناس هم مش نفس لونك وانت مش نفس لونهم وعمركوا ما هتليقوا على بعض.

اقل واجب علاقتكوا هيكون معظمها خناق وتهديد وزعيق وكل واحد عايز يمشي كلامه عالتاني علشان شايف المصلحة في حتة تانية، حرفيا هتبقى صراع بين الخير والشر. مين يعني عايز حياته الشخصية تبقى قضية راي عام وكل من هب ودب يقول رأيه فيها وينصح ويوعظ؟ العلاقات اللي زي كده ولا تحاول تصلحها ولا تحاول ترممها، الاحسن متبدئهاش من الاول ولو انت فيها انهيها وريح دماغك وقلبك وباقي اعضائك. كل اللي بتعمله انك بتديهم اسباب اكتر انهم يهاجموك ويبرروا هجومهم عليك وسخريتهم منك ومن معتقداتك وافكارك وكل حاجة بتؤمن بيها وعزيزة على قلبك.

هو ده مستوى الفكر والاخلاق السائد في العالم اجمع مش في بلدك الصغيرة وبس لا دي حالة عامة في كل العالم.  مش مرتبطة بتخلف او حاجة. هو الشخص المتوسط اصلا تافه وافكاره عقيمة بغض النظر عن جنسيته ومسقط راسه ومش بيتحمل اي فكر جديد او مختلف. وبيستمد اي طوق نجاة من الثقة في النفس والاحساس بالقيمة بأنه يقلل من افكار ومشاعر الناس وهو اصلا مش فاهمها. اللي هو انا مش فاهم انت بتقول ايه بس هسخر منك ومن كلامك احتياطي.

 للاسف الدنيا مش امان ومينفعش تنشر وتعبر عن نفسك بدون قيد ولا شرط. حتى لو انت عايش في اوروبا وامريكا. لان كل المجتمعات فيهم ناس كتير شايفين نفسهم فوق القانون. وحضرتك بتعمل من نفسك فريسة لما تستهون وتنشر معلومات عن حياتك الشخصية قدام كل الناس. وللاسف تاني انت اللي بتديهم مفتاح بيتك بايدك وبترجع تشتكي انهم سرقوك وخربوا البيت.

طيب ما تقفل على نفسك وتحافظ على اسرارك، لازمتها ايه الفشخرة وانت عارف ان اغلبية اللي حواليك ناوينلك نية مطينة.  نفسيات مريضة غرقانة حقد وغل ميملاش عينيهم غير التراب حتى الغني اللي معاه كده. الموضوع مش فقر ولا حرمان وحسد وغيرة كمان اللي معاه اكتر منك بيحقد ويغل.

5. أتمسك بمادئك

دلوقتي اكتر من أي وقت مضى، العالم محتاج ناس متمسكين بمبادئهم. انت لما تثبت على مبدئك بيبقى صعب على الناس الtoxic انهم يخدعوك ويستغلوك. بس لو انت عندك مبادئ معينة، هيبقى صعب أن الناس تخدعك. حتى لو لقيت نفسك حزين، وحيد، ومكتئب، ومش فاهم الدنيا بتعمل معاك كده ليه. خليك ثابت علشان غير كده، فعلا هتلاقي نفسك تحت رحمة أشخاص معندهمش ريحة رحمة. وفر وقتك وطاقتك في حاجات مهمة. اصل ليه هتجادل وتتخانق؟

 لو كنت طيب قوي يستغلوك، لو شرير قوي يحاربوك خليك في النص ولا تولع في نفسك علشانهم ولا تاكل مال اليتيم خليك جدع بس مش جدع قوي خليك مفتري بس طيب. 

هم اسوأ منافسين ليك في الحياة. هم اللي مراقبينك وحافظينك ومزاكرين تاريخ حياتك وعيوبك وعارفين يضربوك فين. ومعندهمش ادنى مشكلة انهم يستغلوك ويستعملوك علشان يوصلوا لاهدافهم. ومش معنى انهم قريبين منك انهم هيضحوا بحياتهم من اجلك والجو بتاع احنا عيلة واحدة ده كلام شعارات بس ساعة الجد مفيش اي مشاكل يجرجروك في المحاكم ويرفعوا عليك قضايا لو في مصلحة ليهم. ايوة الغريب ممكن يعمل اكتر من كده بس الغريب بردو ممكن يحبك ويخاف عليك اكتر من اهلك نفسهم. زي مراتك مثلا تعتبر غريبة بس لما تتجوز بتكون هي اهلك فعلا. زي صاحبك الحقيقي اللي بيضحي بنفسه علشانك. العلاقات القوية مش بتتبني في يوم وليله اه وكمان بتكون نادرة. بس هي موجودة وممكنة يعني.

6. مفيش فشل في الحياة

متفتحش كلام مع حد بيقفله في وشك. الباب اللي بيتقفل في الف غيره بيتفتحوا. لو خسرت صديق سيئ يبقى انت الكسبان، على الأقل، ساب مكانه لصديق حقيقي. أتعلم من التجارب الفاشلة، لأنك دايما في حالة انتقال من حال لحال. والتغيير هو سنة الحياة. الخسائر أكيد هتحصل بس في نفس الوقت ممكن الخسارة تكون فرصة انك تكتشف حاجة جديدة. لا تخف ولا تحزن لان كده كده دايما هيكون في فرصة جديدة.

 كل واحد فينا شاطر في حاجات وفاشل في حاجات. لو انت مش جراح وادتلك مشرط، هتعرف تعمل عملية؟ طبعا لأ. يبقى انت فاشل كجراح بس مش فاشل كانسان. انت بس محتاج حاجة تكون شاطر فيها وتبدع وساعتها هتكون شاطر في اللي انت بتحبه. مش شاطر كانسان. شخصيتك مختلفة عن كل الناس وده اللي بيميزك. متحكمش على نفسك بالفشل المطلق لمجرد انك مرت بكام تجربة فاشلين.

7. أدي كلام الناس حجمه الطبيعي

في درس قاسي أتعلمناه الفترة اللي فاتت، وهو مش درس واحد هم درسين في بعض. أولا، أننا ضيعنا طاقة كتير في الاهتمام بكلام الناس وثانيا أننا فكرنا انهم مهتمين من الأساس. صدقني محدش بيفكر فيك زي مانت فاكر، انت بتفكر كده علشان انت اللي بتفكر في نفسك كتير وفاكر الناس بتفكر فيك. والناس زيك برضه بيفكروا في نفسهم اكتر ما بيفكروا فيك. وانت بتفكر في نفسك اكتر ما بتفكر في الناس. يعني كلها محصلة بعضها.

فحرر نفسك من حمل أن الناس كلها ترضى عنك وتحبك. عيش حياتك زي مانت عايز طالما مش بتغضب ربنا ولا بتكسر القانون ولا بتأذي حد ولا بتجبر حد يؤمن بمعتقداتك ويعيش زيك. بص سيب كل واحد يعيش زي ماهو عايز وعيش زي مانت عايز. وسيب نفسك تعيش زي مانت عايز تعيش. آراء الناس فيك مهمة وكل حاجة بس متدهاش اكبر من حجمها.

الناس مش عايزين اللي ينصحهم، هم عارفين مصلحتهم، وعارفين لازم يعملوا ايه. بس هم مش قادرين او ضعفاء او حاولوا كتير وفشلوا كذا مرة وفقدوا الامل.

لو عايزهم يحبوك، بررلهم فشلهم، متقولش انت محاولتش كفاية او انت معندكش ارادة. قولهم ايوة انتوا جامدين وزي الفل المشكلة مش فيكوا، المشكلة في الاقتصاد في البلد في الحرب الخ. اي حاجة بس متجبش اللوم عليهم. ببساطة كده لو اللي قدمك ده بيشرب سجاير متقلوش السجاير دي مضرة ماهو عارف اكتر منك، شجعه يشربها واشرب معاه عشان ميحسش انه لوحده او انك افضل منه او بتتعالى عليه علشان انت قدرت تبطل سجاير مثلا وهو لا مع انه عايز يبطل بس مش قادر.

ساعتها هتبقى صاحبه وحبيبه. حسسه انك زيه وشبه وتفكيرك شبه. الناس عموما مش بتحب الشخص اللي بيوعظ وينصح، هم عارفين كويس اوي. هم عايزين اللي يبررلهم. فانت ساعتها بين نارين، هتقول لا انا اعيش بدماغي وده الصح وتبقى متطرف في نظرهم، ايوة متطرف علشان كل الناس بتعمل ده وانت الوحيد اللي مبتعملوش مع انه غلط وكله عارف انه غلط بس هم استخدموا مسميات تانية فبقى عادي ومقبول. لاما بتدخل معاهم وتبقى زيك زيهم في الغلط ومحدش احسن من حد والحياة بتمشي وكله بيتراضى. والحقيقة انك تندمج في مجتمعك ده لانه مفيش مجتمع تاني وفرصة الخروج بتقل كل ما بتكبر في السن.

8. بدون مقارنة

كلنا واخدين حقنا من الحياة تالت ومتلت، بس هي متقسمة بطرق مختلفة. إنما لو هنفضل نقارن نفسنا يبقى مش هنخلص. انت عندك حاجة أنا عايزها وأنا عندي حاجة انت عايزها. بس أحنا كل واحد عايش في سياق ومش هي هي. وانت كمان مش بتشوف الصورة الكاملة. انت بتشوف اللي انت عايز تشوفه وتصدقه. علشان كده متقارنش نفسك بحد ولا تقارن حد بيك. وكده كده لو مكتوبلك حاجة هتشوفها ومحدش في الكون هيغير مصيرك ولا قدرك. فاطمئن.

 هو انت فعلا مش هتعرف تميز الانسان الطيب من الانسان الخبيث غير بعد ما تاخد الخازوق. بس انت لازم تبقى عارف من البداية ان عدد الناس الطيبين السالكين قليلة جدا مقارنة بالناس اللئيمة. يعني كل عشرة هتقابلهم هتلاقي فيهم اتنين كويسين مثلا. فالتعامل بالقدر الكافي من الاحترام الا ان يثبت العكس. خلي المواقف تبينلك الشخص مش كلامه، وتكرار المواقف مش مجرد كام حركة جدعنة. لازم تمتحن الناس كتير علشان تتأكد من معدنهم. ده مش هيمنع الخوازيق تماما بس هيقللها. #علاقات #بشر #سلكان#الخير_ضد_الشر

9. احتفظ بأهدافك لنفسك

كلنا عرفنا دلوقتي أن الكلام عن أهدافنا بيخليها تبعد عننا. وبالعكس بيخلق نوع من الحقد والحسد. اللي هو انت ازاي جاتلك الجرأة انك تتكلم عن أهدافك كده. علشان كده احتفظ باهدافك لنفسك على الأقل علشان محدش يجي يخربها. وكمان محدش مهتم اصلا باهدافك دي لأنها مش هتزوده ولا تنقصه. الصح انك تشارك إنجازاتك، بعد ما تحقق الهدف أبقى أتكلم عنه – بس قبل كده اشتغل وانت صامت.

لو مش لاقي حاجة كويس تقولها خلاص اسكت احسن اصل محدش يقدر يمسك عليك كلام انت مقلتهوش بلاش الكلام اللي ملوش لازمة لمجرد أن الهدوء والصمت مش عاجبينك واوزن كل كلمة قبل ما تفتح بقك وتحرك لسانك وشفايفك علشان تتكلم محدش هيقول اللي متكلمش اهو متكنش طيب كده وعلى نياتك والناس تستفزك وتستدرجك في الكلام ويطلعوا منك معلومات وكلام يتمسك عليك خليك حويط واللي يزعل من الطريقة دي ملوش حق يزعل اصلا وكان ناويلك على حاجة وعادي أولها زي اخرها.

10. ركز على بناء شخصيتك

اهم وأصعب درس أتعلمناه وهنختم به كلامنا هو انك تركز على بناء شخصيتك القوية. انت شخصيتك بتكون عميقة ومثيرة لما تمر بتجارب مختلفة مش لما يكون عندك حاجات كتير وممتلكات. حتى نفسك هتحب تقعد مع نفسك لما تكون شخصيتك قوية وعميقة ومثيرة. علشان كده ركز انك تزود شخصيتك وتتثقف وتقرا كتير وتخرج كتير وتعرف نفسك اكتر. كل الحاجات دي هتبني شخصيتك، عن أن انك تركز على الترقية في الشغل أو تشتري عربية احدث موديل أو تصرف المرتب كله على الskincare. طبعا المكاسب المادية مهمة وكل حاجة بس فكر انت عايزها ليه اصلا.

انت ممكن متبقاش محتاج ترقية في الشغل، ممكن بس تبقى محتاج تحس الأمان الوظيفي بس ده مش دايما بيحصل. يمكن مش محتاج تاكل في مطعم غالي، انت عايز بس تحس بالشبع بس ده مش دايما بيحصل. فكر في الإحساس والتجربة وهتقدر تحققها بكذا طريقة، مش شرط تكون طريقة مكلفة أو صعبة عشان تشبع رغباتك.

وملحوظة بسيطة في البوست اللي فاتت أتكلمت أن جزء كبير من تطوير الذات هو انك تدور على الخطر، وانك تلاقي راحتك في المواقف الصعبة. بس ده طبعا ده مش معناه انك تروح تلعب Russian Roulette وتقولي أنا بطور من نفسي. ولا تعمل bungee jumping وتبقى adrenaline junkie وتقولي أنا كده بpush my limits. أنا فكرتي اكتر انك تركب الroller coaster اه هتحس بالخطر بس بتبقى مربوط بحزام الأمان. يعني حاول تخرج من منطقة الراحة حاول تخرج حاجة بسيطة واحدة واحدة مش ترمي نفسك من الطيارة بدون بارشوت. هي طبعا بتعود لشخصيتك وعقلك ومفيش قاعدة معينة انت بتعرف بالsense ده لو عندك sense.

وأخيرا برضه لازم أقولك على الواجب قبل ما تقفل:

اعتقد أن حياتنا هتتحسب قبل وبعد 2019. بس كل التجارب دي أتعلمنا منها وساعدتنا نطور من نفسنا. ومش كل حاجة وحشة وقضى اخف من قضى. وبكده نكون أتكلمنا عن 10 دروس قاسية أتعلمنها من 2019 ولو عندك دروس مختلفة متكلمتش عنها اكتبها في التعليقات ومتنساش تشترك في البلوج وتشترك في القائمة البريدية علشان تنبهك بالبوستات الجديدة لما تنزل.