ازاي تخلي جوزك يحبك وتبني علاقة زوجية قوية بالرغم من تغير الظروف وقسوة الزمن

هاي يا جماعة، اهلا وسهلا بيكم في بلوج جديد. موضوعنا النهاردة هو موضوع عزيز على قلبي لأنه مرتبط بتطوير العلاقات الاجتماعية. ودي من اهم القضايا اللي بتشغلني انا شخصيا، لأني شخص اجتماعي بطبعي وبستمد متعة ملهاش حدود من القعدة مع صحابي. ده طبعا بعد لما ابذل مجهود في بنائها والاقي نتيجة تعبي في علاقة مريحة.

وفي المقالة دي بالتحديد هركز بحثي عن موضوع ازاي تخلي جوزك يحبك. ولأن ده موضوع شائك ومعقد شوية، فأنا اخذت وقتي في البحث والتعمق في التفاصيل علشان فعلا يكون بلوج يستاهل القراءة وفي نفس الوقت ميكونش ممل وتخرجي منه بفوايد كتير. وعلشان العلاقة الزوجية ليها ابعاد كتير انا برضه قررت اركز في البلوج على محاور كتير. بحيث اتكلم في كل التفاصيل المهمة وبردو منساش اي تفصيلة صغيرة.

وفي الاخر اتمنى اكون قدمت رؤية شاملة او تغطي اكبر قدر ممكن من غير اخلال. طيب… الكلام اللي بقوله في البلوج هنا هو مش بس هيخلي جوزك يحبك لو طبقتيه صح، لا، هو كمان ممكن تطبقيه على جميع العلاقات الاجتماعية تقريبا. لأن هنا احنا بنتكلم عن مهارات اجتماعية اساسية تنفع بشكل او بآخر على جميع علاقاتك.

طيب ماشي ايه هي المحاور الرئيسية اللي هنتكلم فيها النهاردة:

اولا: كده والف بيه العلاقات الاجتماعية الناجحة هو التواصل. الحوار اللي ما بينا، الكلام اللي بنقوله لبعض.

ثانيا: الاهتمام فطبيعي لو عايزة تخلي جوزك يحبك طبيعي انك تهتمي به وتسنديه

ثالثا: الوقت الحلو اللي بينسيه هموم الدنيا وبيربطك ويقربك بجوزك اكتر

رابعا: الرومانسية ده بقى التطبيق العملي للحب والجزء الاساسي اللي يخليك جوزك يحبك

خامسا: هندلة العميل اللي هو ازاي تتعاملي مع جوزك وقت الخلاف لان الخلاف كده كده هيحصل

سادسا: وطبعا لقيت ان جزء كبير بردو هو انك تدلعي نفسك وتهتمي بنفسك علشان تكوني جذابة في عين جوزك

سابعا: واخيرا تنمية شخصيتك انت بقى.. لانك لما تكوني في افضل حالتك هتقدري تقدمي افضل ما عندك لجوزك

طيب دي بقى المحاور الرئيسية اللي هنتكلم فيها ونتعمق بالتفصيل. وهي دي موضوعات حلقتنا النهاردة اللي بتركز على ازاي تخلي جوزك يحبك.

ازاي تتواصلي مع جوزك علشان يحبك

بسم الله الرحمن الرحيم واول حجر اساس علشان تخلي جوزك يحبك هو التواصل. لو مفيش تواصل ومفيش كلام تقدري تقولي ان مفيش علاقة اصلا. يبقى اول خطوة علشان تخلي جوزك يحبك هي الحوار بصراحة والتعبير عن اللي انت حاسة به ومحتاجة من العلاقة دي. والتواصل مش هو انك توصلي افكارك بس… هو كمان انك تستقبلي الافكار. لأن التواصل طريق رايح جاي.

واول مهارة في التواصل مش انك تتكلمي بطريقة مقنعة او انك تعرفي توصلي افكارك بوضوح، ده مهم جدا. بس الاهم منه انك تكوني بتعرفي تسمعي. ايوة التواصل الفعال هو عبارة عن انك تكون بتسمعي كويس. مش بالكلام. بأنك تسمعي. والسماع ده مش مجرد سماع، لازم تسمعي بتركيز. متعمليش حاجة ولا تقاطعيه وهو بيتكلم. وتهتمي بكل كلمة بتتقال وحتى حركات ايده وهو بيتكلم تعتبر تواصل بصري.

طيب انا سمعت وفهمت كويس، دلوقتي جيه دوري في الكلام؟ واقول اللي انا عايزاه. يبقى انت كده مسمعتيش. لأنك بعد ما سمعتي يمكن تفتكري انك فهمتي قصده ايه. بس مش دايما ده بيحصل. علشان كده لازم تتأكدي انك سمعتيه وفهمتي صح. يبقى اسئليه اسئلة تاني علشان تتأكدي تاني. يعني انت تقصد ايه؟ يعني انت بتتكلم عن س؟ تقصد ايه لما بتقول ص؟ اسئلي واسمعي الاجابة علشان متفهميش غلط وبعدين تردي غلط.

وصدقيني دي مهارة سهل تتعلميها بالممارسة. التواصل مش مجرد انك نتكلمي بأسلوب مقنع وقوي وواضح. 99% من التواصل اننا نسمع الشخص اللي قدامنا بيقول ايه ونفهم قصده. والمهارة دي هتفيدك جدا في حاجات كتير جدا زي ما هنشوف دلوقتي.

والتواصل مش بس في مجرد الكلام، لأن التواصل له اشكال مختلفة غير الحوار. التواصل كمان في ملامح الوش ونبرة الصوت وحركات الايد. كل دي اشارات ليها معاني. ده حتى الرسالة القصيرة تعتبر تواصل. فهو التواصل مش اننا قاعدين مع بعض بنتكلم وممكن ياخد اشكال كتير جدا. يعني انت جواك مشاعر واحاسيس عايزة تنقليها لجوزك. وبرضه جوزك جواه مشاعر واحاسيس عايز ينقلهالك. وللأسف، اللغة مش دايما بتكون قادرة انها تترجم المشاعر والاحاسيس دي في كلام. فلازم تتواصلي بطريقة واضحة جدا علشان تفهمي جوزك.

بالتالي، من اكتر الحاجات اللي بتقتل التواصل هو الغموض وعدم الوضوح. يعني متتوقعيش من جوزك انه يفهمها وهي طايرة. متتكلميش بكلمات او لغة مش مفهومة لأن كده رسالتك مش هتوصل. بلاش تلميحات يعني ولما تكوني عايزة تقولي حاجة، خليكي واضحة وصريحة. مفيش حاجة اسمها لو بيحبك هيحس باللي جواكي لوحده لان هو مجرد انسان عادي ومعندوش قدرات خارقة.

تقنية التواصل الفعال

التواصل والحوار مش علشان نثبت مين صح ومين غلط. فأحنا مش داخلين خناقة. وفي طرق واساليب معينة لازم نتعامل بيها حتى لما يحصل خلاف. وده محور لوحده هنتكلم فيه قدام شوية. المهم، تجنبي انك تتهمي او تلومي جوزك على حاجة. بحجة انك بتعبري عن اللي جواكي وتقولي حاسة بأيه.

لما تيجي تتواصلي مع جوزك، حاولي قدر الامكان انك تسيطري على مشاعرك. المشاعر غالبا زي مشاعر الغضب ممكن تشوش على التواصل. وممكن تخليكي تتسرعي وتقولي حاجة تندمي عليها. فعلشان التواصل ده يبقى ناجح ومفيد، لازم تركزي على النقاش بطريقة منطقية اكتر بدون تحكيم مشاعرك. متخليش مشاعرك تخرج في كلامك من غير قصد. وحاولي تفهمي مشاعرك اللي جواكي الاول قبل ما تعبري عنها بالكلام.

وفي فن مهم في التواصل. وهو فن الاسئلة. بلاش تسألي اسئلة عارفة اجابتها اه او لأ. زي مثلا، تشرب قهوة؟ الاجابة هتكون اه او لا. في اسئلة مفتوحة زي مثلا عامل ايه في الشغل؟ فالسؤال المناسب في الوقت المناسب، ممكن يفتح قلبه ويحكيلك على كل حاجة. وفي نفس الوقت التواصل ده هيقربكوا لبعض.

ولما يحكيلك بقى عن اللي جواه، دي فرصتك انك تتعاطفي معاه فيحس منك باهتمام ويحبك اكتر. مش لازم بالضرورة تكوني متفقة معاه في رأيه، بس تقدري تظهري انك مهتمة تسمعي وفعلا حاسة به. وعادي انك تعبري عن اختلافك وان ليكي رأي تاني. مفيش مشكلة من اختلاف الآراء وده اللي بيخلي الامور مثيرة. لأنه هيحاول يقنعك وتحاولي تقنعيه، بس من غير احتقان وخناق. وده هيجذبكوا اكتر لبعض لأن الاشياء المتناقضة بتنجذب لبعضها.

وطبعا التواصل بحر عميق وله وسائل كتير وهنختم الجزء ده بفكرة النقد البناء. يعني خلال التواصل ممكن تعبري عن حاجة مش عجباكي بس بطريقة بناءة من غير تجريح. مثلا، هو بيحب يراهن على سباقات الخيل جدا. بدل ما تنتقديه وتقولي انت ليه بتصرف فلوسك على حاجات هايفة. ممكن تبقى طريقة تانية زي مثلا انت بتتعب في الفلوس دي وكل حاجة بس هل فكرت ازاي مصاريفك الشخصية بتأثر على ميزانية البيت؟ ممكن الفلوس دي نصرفها في حاجات ضرورية زي تسديد الديون بدل ما تلعب بيها قمار. ايه رأيك؟ هنا ايوة اتكلمتي عن المشكلة بس مش بطريقة هجومية تخليه ياخد موقف دفاعي، وفي نفس الوقت عبرتي عن نفسك وعن الصح اللي المفروض يتعمل من وجهة نظرك. وفتحتي باب لنقاش ممكن جدا يوصل لنتيجة اجابية.

بس... يبقى اول واهم خطوة علشان تخلي جوزك يحبك هو انك تعرفي تتواصلي معاه وازاي تتجنبي الخلاف والفهم الغلط. وده محور عميق وفيه تفاصيل كتير فهكتفي بهذا القدر علشان عايز اضغط وقت الحلقة. وممكن ندخل على المحور اللي بعده.

الاهتمام اللي يخلي جوزك يحبك

الاهتمام حجر اساسي مهم علشان تخلي جوزك يحبك. وللاسف، زوجات كتير بتعتبر الاهتمام ده بوكس هنعمل عليه تشيك وخلاص.

الاهتمام الصح بيحسسه انك موجودة معاه حتى وانت بعيدة عنه. بيخليه مستني يشوفك تاني علشان يحكيلك على يومه. دي حاجة. الحاجة التانية، هو انه بيحس بالتقدير من زوجته والتقدير ده بيخليه يحبك اكتر.

الاهتمام يعني احساس بالدعم العاطفي والمعنوي. انه بيحب يحكيلك لأنه بيحس انك فاهمة مشاعره ومش بتقللي من مخاوفه واحساسه بالقلق.

تهتمي انك زي ما قلت تسمعي بانتباه، وتبيني بملامح وشك انك بتسمعي كلامه ومتأثرة وبتتفاعلي معاه. اكتر وقت جوزك بيكون محتاج الاهتمام هو وقت المحن والصعوبات. والزوجين اللي بيمروا بظروف صعبة مع بعض، علاقتهم بتقوي طول ما هما متقاربين. حرفيا المعاناة بتكون هي الصمغ اللي يمسكهم سوا.

الاهتمام كمان يشمل التشجيع، ممكن تخططوا حياتكوا مع بعض وتحددوا اهدافكوا. وحتى لو متقدريش تشتغلي بإيديكي معاه، ممكن تشجعيه فقط. مجرد تشجيعه بيدي طاقة وشجاعة انه يحقق الاهداف دي. والتشجيع يكون بالنصائح وانك تزودي ثقته في نفسه.

ولما يحقق اهدافه دي باركيله واكدي عليها. حتى لو انجاز صغير بس يستحق الشكر. لأنه بيبذل مجهود كبير في تحقيق الاهداف دي. ولانها اهداف ممكن تبقى كبيرة، فالمجهود المبذول ممكن يبان قليل، بس هو في نفس الوقت مجهود كبير بالنسبة لشخص واحد. فساعتها شكره وتشجيعه على مجهوده هيحسسه ان في نتيجة وهيستمر. ولو حكيتي عن انجازاته في اجتماع عائلي وعبرتي عن تقديرك له مثلا هيكون ليها تأثير اقوى.

ومن طرق الاهتمام المهمة هي انك تقضي وقت اطول معاه. حتى لو قاعدين بتتفرجوا على فيلم في التلفزيون، او جهزتيله وجبة عشا، او نزلتوا اتمشيتوا. كل فرص التقارب بتظهر الاهتمام بأنك عايزة تبقي جنبه وتتقربي منه بكذا طريقة. وده المحور اللي هنتكلم عنه كمان شوية.

افضلي ادعميه حتى لو بكلمة حلوة، او هدية بسيطة في عيد ميلاده، او عزومة في مطعمه المفضل. احضنيه. سمعيه كلام حب. متكسفيش ان الحب يظهر عليكي وتعبري عنه بطرق رومانسية. ده جوزك يعني مش راجل غريب. هي الفكرة ان اللفتات الصغيرة دي لما بتتكرر على المدى الطويل بتخليه يتعلق بيكي اكتر ويحبك. وبرضه هنتكلم اكتر عن الرومانسية.

لما بتكوني قريبة قوي من جوزك، بتلاحظي أي تغيرات بسيطة. حتى لو تفصيلة صغيرة. بس لازم تفهمي ان جوزك من الطبيعي ان شخصيته تطور وتتغير. من علامات الاهتمام الزائد، انك تسأليه وتستجوبيه، ايه اللي حصلك، اتغيرت ليه، مبقتش زي الاول. طالما ان التطور ده مش بيبعدوا عنك او تغيير كبير، خليه عادي. ودوري على طرق جديدة علشان تتأقلمي مع الشخص الجديد.

اصل اي شخص محتاج يحس بمساحة شخصية يطور ويجرب في نفسه. بالذات لو في شخص تاني بيعد عليه انفاسه. بردو بيبقى عايز شوية حرية ميحسش ان زوجته بتتدخل في حياته الشخصية وبتقوله يفكر في ايه وميفكرش في ايه. حتى لو الاهتمام ده من دافع الحب، ممكن يخنق جوزك ويحس انه متراقب طول الوقت بطريقة وحشة. هو التوازن بين انك موجودة علشان تدعميه بس سايبة مساحة من الحرية.

واخيرا، انت مش مطالبة انك تشاركي جوزك نفس الاهتمامات والهوايات، بس على الاقل احترميها. ممكن جوزك مثلا بيحب يتفرج على ماتشات الكورة، بس انت مش بتحبيها. مش لازم تحبيها بالعافية ولا حاجة، بس مش لازم تشتمي الكورة. ساعتها هيحس انك بتشتميه هو لأنك بتشتمي حاجة هو شايفها مهمة. فخليه يتمتع بالحاجة دي حتى لو انت مش مقتنعة 100% مش لازم تقللي منها.

التواصل مع الاهتمام كومبو جامد جدا يخلي جوزك يقع في حبك من اول وجديد. بس هي مش حاجة بنعملها من غير روح ولا عاطفة. لما بتيجي من القلب فعلا بيكون ليهم مفعول السحر. وهم ركنين اساسيين في بناء علاقة زوجية ناجحة وسعيدة تدوم العمر كله.

انشطة زوجية للتقارب

يمكن العلاقة الزوجية ممرتش بمراحل اساسية لان الزواج تم بسرعة. واللي بيعقد الامور اكتر، ان الوقت اللي بتقضوه مع بعض قليل. سواء لو كان الزوجين بيشتغلوا ومش بيتقابلوا غير في الweekend. او الزوج دايما في الشغل علشان يوفر احتياجات البيت. يبقى لازم تستغلي الوقت القليل في تعويض الوقت اللي ضاع وفي نفس الوقت تخلي جوزك يحبك.

ازاي هتقضوا الوقت القليل ده مع بعض هو اللي هيعمل فرق كبير جدا.

ولو رجعتي بالزمن هتلاقي ان الحاجة اللي بتحبوا تعملوها مع بعض هي اللي شدتكوا لبعض من الاول. يعني في ارضية مشتركة تقدري تبني عليها دايما. ولو مش موجودة هتحتاجي انك تجربي لغاية ما توصلي لحاجة.

ممكن الزوجين دول بيحبوا الاكل جدا، يبقى طريقة التقارب هتكون انهم يقعدوا يطبخوا مع بعض. ويعملوا وليمة ويعزموا الاهل والاصدقاء.

ممكن تكوني من النوع اللي بيحب السفر والترحال. يبقى الوقت اللي هتقضوا مع بعض عبارة عن انكوا بتخططوا تسافروا حتى جديدة. والمواقف اللي بتحصل في السفر هي اللي تقربكوا لبعض.

مثلا بتحبوا مشاهدة افلام ومسلسلات، يبقى بتحبوا تعيشوا في عالم الافلام وهي دي الطريقة اللي بتحسسكوا بالقرب من بعض.

في ازواج رياضين وبيحبوا يروحوا الجيم مع بعض ويتمرنوا مع بعض. او اي انشطة بدنية زي العجل او السباحة او المشي.

ممكن عندكوا هوايات مشتركة بتحبوها زي الرسم او النحت او بتحبوا تعملوا مشاريع مع بعض تعملوا ديكورات في البيت على ذوقكم مثلا. حتى لو بتحبوا القراءة ممكن تجيبوا كتب تقروها وتناقشوها مع بعض. وهتعرفكوا على طريقة تفكير بعض. وممكن تكونوا بتحبوا اللعب زي البلايستاشن.

جربي كل حاجة. كل الانشطة اللي هتقضوها مع بعض هتقربكوا لبعض وهتخلي جوزك يحبك بالتبعية. اصنعوا ذكريات مع بعض يعني. واكيد في حاجة مشتركة هتكون هي الsweet spot بينكوا. واكيد اخرجوا في مواعيد غرامية علشان تعوضوا فترة بناء العلاقة، روحوا المتاحف والاهرامات والاقصر واسوان.

المشاعر المتبادلة دي هتربطكوا ببعض وتخليكوا تشوفوا الدنيا من عيون بعض. الانشطة دي في حد ذاتها مش مهمة. بس هي تجارب مشتركة مش اكتر. فلما تكوني مع بعض هتحسي ساعتها انك فعلا مش فاهمة جوزك وهو مش فاهمك. بس لما بتتعاملي معاه في مواقف مختلفة كل حاجة بتتغير.

سحر الرومانسية

الرومانسية تعتبر مرحلة عميقة من العلاقة الزوجية. وهي احلى حاجة فيها. والغلطة اللي بتعمليها انك عايزة توصلي لمرحلة الرومانسية بسرعة. وده مينفعش علشان الرومانسية مبنية على الخطوات اللي اتكلمنا عنها في الاول. ولو مش بانيين العلاقة على اساس قوي، الرومانسية بتطلع نص سوا بتبقى محن وتلزيق. فالرومانسية بتبقى نتيجة طبيعية لو عملتي كل حاجة صح من البداية، ومفيش اختصارات.

مع وضع هذا في الاعتبار، ازاي بقى نحضر الرومانسية في العلاقة.

اولا: لازم تبقي شاطرة في التواريخ. لأنك لازم تحتفلي بكل حاجة في العلاقة. بدءا بعيد ميلاده ويوم جوازكوا لحد اول يوم اتقابلتوا والفلانتاين او عيد الحب. ولو عرفتي تربطي المناسبات العامة بجوازكوا يبقى كويس. ولو عرفتي كمان تخترعي اعياد جديدة يبقى تمام اوي. الفكرة هنا في الاحتفال. احنا بنحتفل ببعض، بحبنا، بكل حاجة في علاقتنا لانها مهمة.

ثانيا: المفاجآت الرومانسية. لازم كل فترة تعملي حاجة جديدة بطريقة مفاجأة. ممكن تعمليله عشاء على الشموع في يوم من غير ما يتوقع. وده حاجة ممكن تبدعي فيها. وكل ما تخططي وتفكري، كل ما المفاجأة يكون ليها تأثير اقوى. ولو عملتي افكار جديدة، اكيد الرومانسية عمرها ما هتقل ولا تروح منك.

ثالثا: الانسان بيتأثر جدا بحاسة البصر. ودي اكتر حاجة ممكن تلعبي عليها بنتائج مضمونة. يعني شوية اهتمام بمظهرك ممكن تخلي يبقى صعب يشيل عينه من عليكي. والخدعة هنا انك تحافظي على مظهرك عادي في البيت، وفي المناسبات الخاصة، تعلي الفولت. يعني تاخدي بالك من مظهرك وفقا للموقف. التجديد مهم علشان ميملش ونحاول منهدرش كتير. وهنتكلم اكتر عن الموضوع ده بعد شوية.

رابعا: الحكايات والقصص. من اقوى الادوات اللي معاكي طبعا حكاية الحكايات. القصص دايما بتنقل كل المشاعر والاحاسيس اللي عايزين ننقلها بطرق غير مباشرة وسهلة تتفهم. ودي فن من الفنون المفقودة بس ممكن تبقى فعالة جدا في زيادة الرومانسية بين الزوجين. لو عرفتي تحكيله حكايات وقصص، هتقدري تسيطري على تفكيره وتخليه يحبك جدا. وهنا مش قصدي حوارات تألفيها. اختاري قصص تقدري تربطيها بحياتكوا مع بعض واعرفي ازاي وامتى تحكيها.

خامسا: اللمس. اللمس له معاني كتير جدا وممكن يتعمل في اوقات وسياقات مختلفة وله تأثيرات مختلفة. بس هو عنصر اساسي في زيادة الرومانسية بين الزوجين. الحضن، البوس، كلها حاجات من ضمن اللمس. وانا هبقى اتكلم في الموضوع ده في حلقة تانية.

حلول عصرية للخلافات الزوجية

من اهم مهارات تطوير المهارات الاجتماعية في سياقات مختلفة: حل النزاعات. ودي حاجة بنحتاجها في كل علاقاتنا، ولو عايزة جوزك يحبك فعلا لازم تتعلمي المهارة دي وتتقنيها كمان. وطالما لسه بتسمعي لغاية دلوقتي يبقى انت ماشية في الطريق الصح. وهتخلي جوزك يحبك قريب اوي ان شاء الله.

المهم، ايه هو حل النزاع؟ حل النزاع هو مجموعة من الادوات اللي بتساعدنا نحل الخلافات اللي بتحصل في العلاقة. وخلينا متفقين ان مفيش علاقة بتخلوا من خلافات. واللي بيفرق فعلا هو ازاي بنتعامل مع الخلاف، ازاي بنختلف اصلا، ازاي هنهندل العميل لما يكون زعلان مننا. وكل واحد له استايله واسلوبه يعني وفي طرق فعالة وفي طرق مش فعالة اوي.

اول مهارة من مهارات حل النزاع اتكلمنا فيها اصلا، وهي اننا نسمع بتركيز ونفهم وجهة نظر الشخص اللي قدامنا. فانا مش هتكلم في الطريقة دي كتير. يعني انتِ تعرفي هو مضايق من ايه ومضايق منه ليه اصلا وحاسس بأيه وكده.

تاني حاجة واحنا بنحل مشكلة لازم نتجنب نطلع نفسنا صح والطرف التاني غلط. ونتجنب اننا نحمل المسئولية للشخص التاني. بالعكس، احنا عايزين نقعد مع بعض ونحط المشكلة قدامنا ونشتغل مع بعض على حلها. معناته ايه الكلام ده؟ يعني هي مش مبارزة لاننا في الاخر عايزين نوصل لحل علشان نحافظ على العلاقة وتستمر.

طيب... احنا خلاص حددنا مصدر الخلاف ايه، وبعدين؟ بعد كده شوفي كل طرف هيقدر يعمل ايه علشان ينزع فتيل الازمة. ودي محتاجة اننا نشتغل مع بعض مش ضد بعض. زي مثلا لما تخشي مفاوضات. انت بتبقى ليكي اهداف عايزة تحققيها وفي نفس الوقت في تنازلات لازم تقدميها. فهو هنعمل ميزان بين المكاسب والتضحيات علشان محدش يتظلم.

بعدين متنسيش تحددي النتيجة اللي عايزة توصللها، النتيجة اللي ترضيكي وترضي جوزك. بحيث ان كل واحد يطلع من الخلاف مبسوط. وطبعا ده مش هيحصل بالكامل لأن كل طرف هيقدم تنازلات. فالفكرة ان التنازل ده ميكنش اكبر من المنفعة ولو ده حصل يبقى لازم نقعد مع بعض تاني ونشوف حل وسط.

مفيش مانع ان المفاوضات تطول شوية على حسب تعقيد الخلاف. لأن في خلافات بتكون معقدة جدا فعلا ومحتاجة اكثر من قعدة. وده كمان ضروري للحفاظ على الهدوء. لأن عادة اللي بيحصل ان كل واحد بيكون عنده قلق ان اهدافه متتحققش ويفضل يفكر ان مضطر يحارب من اجل الحصول على ما يريد. فهنا لما الغضب بيزيد بيبقى صعب نوصل لحل، والموضوع بيقلب خناقة. فلازم كل واحد ياخد وقته كده لغاية ما المشاعر تهدى شوية ونبتدي نحكم عقلنا. يبقى اثناء حل النزاع دايما حافظي على الهدوء من غير زعيق وتجريح وتهديد وتصعيد والكلام عن الماضي او حوارات ملهاش علاقة بالنزاع.

علشان اسهل حاجة بتحصل ان ساعة الخلاف نتكلم في حاجات قديمة واحنا فوتناها بس برضه لسه متغاظين منها. يبقى بلاش نخلط الاوراق ونركز في المشكلة الحقيقية.

ممكن مع الجلسات الكتير تكتشفي انك غلطانة في حاجة. عادي كل الناس بتغلط وكل الاطراف اكيد هتطلع غلطانة. بس احنا مش عايزين نعرف مين صح ومين غلط. فلو لقيتي نفسك غلطانة، عادي انك تعترفي بده وتتأسفي عليه. وتفهمي انت غلطي في ايه وتصلحيه. لانك كده هتوري جوزك انك متحملة المسئولية وهتخليه يثق فيكي لما يفهم انك عارف غلطك. وكمان ممكن هو يحن ويلين ويعترف باخطائه هو كمان.

اصل في الاخر دي علاقة زوجية مبنية على المودة والرحمة. واي علاقة في الدنيا بين اي اتنين بني آدمين لازم هيحصل فيها تضارب مصالح، فلازم تفهمي ده وتكوني مستعدة تحافظي على حقك.

واكيد انت هتبقي عايزة توصلي لحل يرضي جميع الاطراف. زي ما هو مهم تحددي اسباب الاختلاف، لازم تحددي اسباب الاتفاق. لأن لو بصيتي على النزاع هتلاقي ان في مصلحة مشتركة. وهو ده اللي لازم تركزي عليه دايما. لأن في حاجة ممكن انتوا الاتنين تكونوا مشتركين فيها.

لو عملتي كل ده وبرضه مفيش حل، يبقى ممكن حد كبير من العيلة يتدخل. اي حد يكون مصدر ثقة للطرفين ممكن يقدم رأيه في الموضوع ويكون امين عليكي. او ممكن تدوري على حد مختص يقدملك استشارة. زي المختصين النفسيين في العلاقات الزوجية يقدروا يسعدوا الطرفين في حل مشاكلهم. ولو الدنيا قفلت خالص والطرف التاني بايع الدنيا، يبقى وكلوا محامي شاطر يكون وسيط مابينكوا. او كل واحد يقوم محامي والمحاميين يوصلوا لصيغة مرضية للطرفين، طبعا في سياق الاحترام والادب والتحضر. يعني حتى لو الخلاف خرج عن السيطرة نفضل محافظين على الاحترام المتبادل بينا. احنا مش همج.

وهي دي اساسيات حل النزاع بطريقة ودية ولطيفة قدر الامكان. بس مع استحالة حل النزاع في طرق تانية اعقد واصعب اتمنى منوصلهاش بس هي ابغض الحلال. مش بس هتنفعك في بناء علاقة زوجية قوية مبنية على الاحترام والتقدير لكن كمان هتنفعك في باقي علاقاتك.

اهتمامك بنفسك يخلي جوزك يحبك

زي ما قلت في اول الحلقة انا لقيت ان جزء كبير بردو هو انك تدلعي نفسك وتهتمي بنفسك علشان تكوني جذابة في عين جوزك. ازاي وليه وفين وامتى؟ من اشكال العناية الجسدية التركيز على التغذية. فعلا فيه اكلات بتزود الجمال زي الافوكادو التوت السلمون الجزر المكسرات السبانخ الطماطم الزبادي الشوكولاتة الداكنة. وفيه اكلات تتجنبيها زي الحلويات والاطعمة الدهنية والمقلية والاطعمة المملحة والمصنعة والوجبات الدسمة واكيد الكحول.

دي لوحدها كفيلة انها ترد فيكي الصحة وتظبط وزنك وتحلي شكلك. مع ممارسة الرياضة بانتظام خلاص كده انت مش محتاجة حاجة تاني. صحتك ومودك هيبقوا في احسن حال ان شاء الله. جاذبيتك هتزيد الضعف وشبابك هيزيد ان شاء الله.

حاجة تاني؟ ياه ده في حاجات تاني كتير. في بند مثلا زي الskincare العناية بالبشرة. لازم لازم لازم يكون عندك روتين العناية بالبشرة. لان البشرة هي اللي هتخليكي جذابة وهتخلي شكلك احسن واحسن. ونحاول بقدر الامكان نبعد عن اشعة الشمس الحارقة. وجمال المرأة مش بس في بشرتها، كمان في شعرها. والعناية بالشعر بند تاني بس لازم تهتم به. خليكي زبونة دائما في الكوافير والspa. وطبعا اهتمي بكل تفاصيلك الصغيرة حتى ضوافرك.

ومن ضمن الاهتمام بالصحة القيام بالفحوصات الطبية كل 3 شهور واهم فحصوات طبية نعملها وظائف كلى، سكر (عشوائي وتراكمي)، كوليسترول، وظائف غدة درقية، صورة دم.

طيب ده بالنسبة للصحة الجسمانية والصحة العقلية اي ظروفها.

في بقى تمارين الاسترخاء والتأمل واليوجا، دي بتعمل اعادة ترتيب جوة مخك وبتنظم التفكير. بتخليكي هادية مش متعصبة تقدري انك تواجهي الحياة بذهن صافي. وده مهم علشان جوزك يحبك.

لو بتشتغلي بردو حاولي تنظمي بين حياتك الشخصية وحياتك العملية. كل حاجة تاخد وقتها. حافظي دايما على وقت خاص بيكي للاسترخاء والراحة والبعد عن الارهاق.

ومتنسيش حياتك الاجتماعية، لو بتخرجي مع صديقاتك او بتتواصلي مع اهلك. برضه حافظي على علاقاتك دي كلها. لان كلها مرتبطة ببعضها. وادعمي الناس في حياتك واطلبي منهم الدعم لما تحتاجيه.

في حاجات تانية بتنمي الصحة العقلية ممكن تتعمل زي مثلا ممارسة التفكير الاجابي اللي هو بيزود ثقتك في نفسك. متتكلميش ابدا مع نفسك بطريقة سلبية. حتى بينك وبين نفسك لازم تتواصلي بطريقة فيها تشجيع واجابية. متنتقديش نفسك ابدا وتقولي عن نفسك حاجة وحشة.

بعيدا عن الاهتمامات المشتركة مع الزوج، كوني لنفسك اهتمامات وهوايات خاصة بيكي. وخصصي وقت لده كمان. دي حاجة هتساعدك تخففي الضغط والتوتر اليومي.

ومن ناحية مظهرك الخارجي، اهتمي به زي ما تهتمي بصحتك النفسية. البسي الملابس اللي على ذوقك وتعبر عن شخصيتك.

بكل بساطة الاهتمام بصحتك. اكاد اجزم انك لو عملتي الحاجات دي كلها لفترة، هتلاقي نفسك الطاقة الانثوية عندك بقت في السما. وهتحسني علاقاتك كلها مش بس مع جوزك. لان اي انسان يهتم بنفسه، طبيعي ان يجذب اهتمام الناس.

تنمية شخصيتك تحبب جوزك فيكي

تنمية شخصيتك وتطورك حاجة بتعمليها لنفسك، ومن فوائدها الجانبية انها تخلي جوزك يحبك. يعني متتغيريش علشانه ولا علشان اي حد. اتغيري للاحسن علشان نفسك، وبكده، هيبقى الحب والسعادة نتايج تلقائية.

اللي اتكلمنا عنه كتير ولسه في حاجات اكتر تعمليها وممكن تزود الطاقة الانثوية عندك بكتير. زي مثلا التواصل بطريقة انثوية، يعني الصوت العالي بلاش منه. خالص. مراقبة الناس وانك تقعدي تقولي دي جوزها جابلها ولا سافرت وعملت بردو مفيش من الكلام ده نهائي. ركزي في نفسك وبس. ركزي على تنمية شخصيتك وتحسين علاقاتك.

من اكتر الحاجات اللي بتدي الحياة معنى وتساعدك تطوري شخصيتك انك يكون عندك ليستة اهداف تشتغلي عليها. سواء اهداف شخصية او مهنية. وبعدين تشوفي انت محتاجة تتعلمي ايه. هل لازم تاخدي كورسات او تقرأي كتاب؟ اعملي كده. في مهارة الذكاء العاطفي اللي ممكن تتعلميها وهتنفعك في التعامل في علاقاتك.

ومن اكتر الحاجات الاساسية تطوير الجانب الروحي، ممكن بالصلاة. او بالتوكيدات الاجابية، وممارسة طقوسك الدينية. فدي جزء اساسي في شخصية اي انسان وعدم وجودها يعمل خلل كبير.

تلاقيكي بتسألي دلوقتي يعني خلاص هو ده اللي هيخلي جوزي يحبني؟ قولي يا رب الحب والكره مشاعر مبنقدرش نتحكم فيها. بس اه دي الاسباب اللي ممكن تاخدي بيها وتخلي جوزك يحبك. جمال المرأة ده له مدارس ومذاهب. بس الجمال الداخلي وكاريزما الانوثة ده بجد موضوع غامض وملوش كتالوج. فده مجرد بلوج مينفعش نحمله اكتر من كده. بس في النهاية، هو ده الطريق والاتجاه اللي هيوصلك لاكتر نتيجة ترضيكي، وتحسن علاقتك الزوجية بمراحلة.

ملخص

هي مش حاجة واحدة تعمليها وخلاص، هي مجموعة عوامل بتتعمل مع بعض بخطوات معينة فتخلي جوزك يحبك. ودلوقتي تعالي نلخص كل الكلام ده في حاجة بسيطة. يعني علشان نربط الكلام ببعض، اول حاجة بنعملها اننا بنعرف نتواصل بطريقة فعالة، من خلال التواصل ده بننقل مشاعر الاهتمام والتقدير، بنقرب لبعض اكتر بنفهم بعض وطريقة التفكير والتعامل، بنوصل لمراحل اعمق بتتجسد في اننا بنعيش في عالم رومانسي. طول الوقت عارفين ان الخلاف ممكن يحصل وعارفين نرسم حواليه حدود ميخرجش منها. واخيرا بنهتم بنفسنا وبنطور منها.