أسرار صناعة المحتوى الجزء الثاني

 أتكلمنا في اللايف اللي فات عن أنواع المحتوى وازاي تصنع محتوى ودلوقتي هنتعمق اكتر واكتر في الموضوع. وقلنا النجاح مش بيكون في يوم وليلة ده بياخد وقت ومجهود وصبر، وانك متركزش على التفاعل على قد ما تركز على صناعة محتوى كويس. لأن المحتوى المميز هو اللي بيجيب تفاعل ومش اي تفاعل.

لما تعمل حاجة تغضب ربنا وتستفز الناس ماهو ده بيجيب تفاعل وبيجيب ذنوب بردو. كل الناس اللي بتشتم وتدعي على صانع المحتوى ماهو تفاعل. بس تفاعل سلبي وبيأثر عليك نفسيا ومهما حاولت تتظاهر انه مش بيأثر فيك، بردو نفسيتك بتتأثر. بس لو عملت محتوى ايجابي ويفيد الناس، هتلاقي تفاعل اجابي وطاقة ايجابية تدخل حياتك.

وهتكون نفعت الناس ونفعت نفسك. والمنصات مليانة محتوى سلبي وخناقات. احنا مش عايزين خناقات مع انها بتعمل تفاعل بس عايزين نعمل تفاعل يكون ايجابي وننشر طاقة ايجابية وقدامنا ساعتين نتكلم في ادق التفاصيل ونعرف اكتر عن صناعة المحتوى.

والكلام ده ممكن تستخدمه في الخير وممكن تستخدمه في الشر. دي حاجة بينك وبين ربنا انا مش حدخل بينك وبين ربنا بس انت براحتك. انا بنشر العلم ده عشان اخد ثواب عشان ممكن حد يشوفه ويقول انا هبدأ اعمل محتوى او انا حغير من طريقة عمل المحتوى بتاعي.

1. 1. اعمل حاجة مختلفة بطريقة جديدة

سواء لو كنت لسه جديد أو قديم، اهم حاجة التجديد في المحتوى بتاعك. اول خطوة للتميز انك تعمل حاجة جديدة بطريقة جديدة. وممكن تميز نفسك انك تعمل نفس الحاجة بس بطريقة جديدة. ممكن تقدم المحتوى بتاعك بطريقة مختلفة، ممكن تتقمص شخصية انسان مسافر عبر الزمن من الماضي وبيتكلم عن اخبار الزمن اللي احنا فيه.

لو المحتوى بتاعك اكل ممكن تعمل قناة بتستخدم فيها 3 مكونات فقط وتخترع منها اكلات. انا قصدي تعمل حاجة مبتكرة. اقعد فكر كتير وجرب واتعلم من كل حاجة بتعملها. حتى لو الحاجة دي قديمة واتهرست في افكار كتير قبل كده انت ممكن تضيفلها حاجة جديدة تغيرها وتخليها موضة جديدة تاني.

كل الافكار الجديدة بتكون مبنية على افكار قديمة بس اتطورت مع الوقت. مفيش فكرة بتكون اصلية 100%، كل الافكار بتكون مجموعة مختلفة من الافكار متركبة بطريقة مبتكرة وبتطلع فكرة جديدة. فكر في الحاجات اللي انت بتحبها والمواضيع اللي بتجذبك وازاي تربطها ببعض وتطلع منتج جديد وفي نفس الوقت يعجب الناس. متعملش حاجة تعجبك انت بس اعمل محتوى تشاركه مع الناس والناس تحب تستهلكه.

وده سر الخلطة الحقيقية عشان يبقى في تفاعل. لو عايز تعمل حاجة انت بس اللي بتحبها وانت بس اللي فاهمها يبقى هتشاركها مع الناس ليه. اعملها لوحدك وخلاص. اصل ملهاش لازمة تنشر حاجة لو ملهاش جمهور. احنا هنا بنشارك بعض افكارنا وبنطورها مع بعض هو ده الهدف من التواصل بس لو انت الحاجة دي بتاعتك لوحدك يبقى هتسوقها ليه زي بضاعة ملهاش زبون.

دور على الحاجات المشتركة بينك وبين الجمهور حاجة تقدر تبني حواليها قاعدة جماهيرية، حاجة ليها جمهور اصلا عليها طلب. مثلا زي الانيمي مع ان ناس كتير مش بتحبه بس له جمهور وكلهم عارفين بعض. لو بتحب الانيمى وهاوي الطبخ اعمل قناة تقدم فيها وصفات من الانيمى اللي بتحبه مش عارف دي اتعملت قبل كده ولا لأ بس انا بقولك مثال. حاول تربط اهتمامتك ببعض وتتطلع منهم حاجة جديدة وفي نفس الوقت حاجة يكون ليها جمهور يتفاعل معاك.

2. 2. خليك جلدك سميك

النقطة اللي بعد كده انك تخلي جلدك سميك. يعني ايه جلدك سميك. يعني متتأثرش بأي حاجة وتبقى خفيف. لأنك اول لما بتبدأ بتلاقي ناس كتير حواليك مش مصدقينك ومش فاهمينك اصلا. فأنت اول محتوى هتعمله غالبا هيكون ملهوش اي 30 لازمة بس الفكرة انك تستمر فيه وتعمل المحتوى ده حتى لو هتتعب شوية في الاول ومش هتلاقي منه فايدة.

هتشك في نفسك وهتحس ان اللي بتعمله ده ملوش لازمة بس لازم تستمر في صناعته وساعتها الشغف وحبك ليه هيديلك دافع تكمل. واهم حاجة متسمعش اي حد يقولك متكملش ويحبط. لازم تكمل ده لو عايز تبقى صانع محتوى او مؤثر حقيقي. لأن مش الناس لما بدأوا لقوا حد يأيدهم. في ناس كتير بدأوا بالرغم من ظروفهم وكملوا ونجحوا وبقوا عندهم حسابات مليونية على جميع المنصات.

لو كانوا جالهم احباط من الاول مكناش هنعرفهم ولا نسمع عنهم زي ملايين كتير جربوا وبدأوا بس مكملوش. المفيد انك تخلي عندك صبر وتكمل وانت متعرفش المحتوى هيسمع امتى، ممكن من اول يوم وممكن كمان شهرين وممكن تاخد سنين. متخليش التفاعل هو المقياس في المراحل الاولى. ركز دايما انك تحسن المحتوى بتاعك وتخليه احسن حاجة بالامكانيات المتاحة ليك.

واهم نقطة ان لما المحتوى بتاعك يكون جامد هيعمل تفاعل. معظم الصناع بيكونوا عايزين التفاعل بأي شكل وبيكروتوا المحتوى مع ان المحتوى هو اللي هيعمل تفاعل. دي فعلا مفهاش حظ. انت بتعمل احسن حاجة تقدر تعملها عشان تطلع محتوى كويس يعمل تفاعل ومشاهدات. بس لو انت اصلا عملت محتوى وحش ازاي هيجيب تفاعل.

لو محبط او تعبان وملكش مزاج ابعد عن المحتوى لغاية ما يجيلك مزاج ويبقى عندك طاقة. ليه؟ لأن اي محتوى وحش هينعكس عليك انت والشخص اللي انت ضيعت وقته هيدعي عليك. بس لو عملت المحتوى ده بمزاج، الشخص التاني اللي بيستهلك المحتوى هيحب المحتوى وبالتالي هيكون عايز محتوى اكتر. لأنه عارف انه حلو. اما بقى لو انت بتعمل محتوى سد خانة مش هتقنع حد.

هتبقى زيك زي مليون واحد تاني بيعملوا محتوى مش هتبقى مميز. وهقولك على سر كمان: جودة المحتوى بتاعك بتجذب ليك جمهور كويس. عشان جمهور عن جمهور يفرق. زي درجة اولى وتانية وتالتة. انت عايز جمهورك يبقى درجة تالتة ولا عايز جمهور راقي ومحترم. شوف على حسب انت عايز ايه والمحتوى بتاعك هيجذب ليك الشخص ده.

3. 3. متكشفش كل ورقك

النقطة اللي بعد كده هي انك متكشفش كل ورقك. حرفيا ده اكتر مجال تنافسي شوفته في حياتي، كل بيتصارع انه يكون رقم واحد. عشان رقم واحد هو اللي بيفوز بكل حاجة. ومينفعش يكون في اكتر من رقم 1، ينفع يكون في رقم 2 و3 و4 وهكذا. وكل المحتوى بيكون مبني على افكار، والافكار كتير، بس الافكار الحلوة قليلة.

ممكن تعمل فكرة حلوة وتنجح جدا بس الصعوبة انك تفضل محافظ على النجاح ده. كل شوية هتحتاج فكرة حلوة تاني عشان تفضل في الاذهان وده شيء مرهق. ده غير ان في منافسين تانيين عايزين ياخدوا مكانك. فبتبقى بين نارين.

عشان كده بقولك متكشفش كل اوراقك. في حاجات لازم تعملها مفاجأة، متقولش انا هعمل وهعمل. اعمل علطول عشان محدش يسرق الفكرة ويعملها بدالك. وطبعا متكشفش افكارك بتجبها منين ومتتكلمش عن الاستراتيجية. هو عمل ابداعي بس في جانب تجاري شوية، والتجارة فيها منافسة شديدة.

عشان كده لازم ساعات تخبي مصادرك وحتى لو عملت تعاون مع صانع محتوى تاني متقلوش على كل حاجة. ومش لازم كل حاجة تنشرها على العلن خاصة عن شغلك لأنك مش بتكون عارف دايما مين بيراقبك في صمت. يمكن دي حتة بارانويا عندي زيادة بس انا مبقتش زي الاول بتكلم في كل حاجة عن شغلي عشان ده بيأثر علينا بعدين.

المهم انك متكشفش كل ورقك ولو مش لازم الناس تعرف حاجة معينة خلاص مش لازم تقولها. احتفظ بيها لنفسك. لازم تاخد بالك ان المنافسين دايما مستنيين اي فرصة عشان يغلبوك في شغلك، متدهمش انت الفرصة دي. لانك كده كده هتقابل تحديات صعبة في صناعة المحتوى فمتصعبش الدنيا على نفسك اكتر من اللازم.

وطبعا كل صانع محتوى له ظروفه. في صناع محتوى المحتوى بتاعهم اصلا قايم على مشاركة حياتهم الشخصية. دي حريتهم الشخصية وهم ادرى. انا بتكلم عن صناع محتوى وفي نفس الوقت بيحاولوا يديروا شركة. فكلنا بنخلي بالنا بنشارك ايه عشان اصلا كل حاجة بنحطها اونلاين بتفضل اونلاين للابد وبيبقى شبه مستحيل نرجع نمسحها يبقى بلاش من الاول نتكلم في كلام ونرجع نقول يا لو مكنتش اتكلمت.

كل واحد يبقى فاهم هو بيصنع المحتوى ده ليه ولمين وبردو يكون عامل حسابه ان في مخاطر وتحديات ممكن تأثير عليه وعلى سمعته وشخصيته وبريستيجه وكده.

4. 4. خلي حياتك العامة منفصلة عن حياتك الخاصة

النقطة اللي بعد كده خلي حياتك المهنية منفصلة عن حياتك الشخصية. وهنا يا جماعة لازم نفرق بين نوعين من صناع المحتوى. في نوع بيعمل personal brand وبيبني عالمه الخاص مع جمهوره، والجمهور بيدخل حياته عادي. وفي نوع تاني اللي هو انت مثلا شركة تجارية بتبيع منتجات. النوع الاول عادي انك تشارك اجزاء شخصية من حياتك، النوع التاني انت بتركز على المنتجات اللي بتبعها.

وفي طبعا منطقة رمادية كبير زي مثلا انت سمسار عقارات او محامي فبتقدم جزء من حياتك الشخصية وبتقدم بردو الاستشارات والنصائح الاحترافية. بس لو انت بتبدأ وعايز تعمل brand لنفسك ركز على المحتوى بتاعك ومتركزش على نفسك ده اللي بيفرق الهاوي من المحترف. في ناس كتير بتستخدم السوشيال ميديا كترفيه وتضييع وقت، وفي ناس بتستخدمها جد. فأنت لو عايز تبقى جد يبقى ركز على الniche.

مثلا انت قناة بتعمل محتوى انيمى يبقى تعمل محتوى انيمى بس. متجيش تعمل مثلا محتوى عن الافلام الابيض واسود في فترة الخمسينات ومتنشرش انت اكلت ايه النهاردة. اقل واجب خلي محتوى القناة 80% انيمى و20% اي حاجة تاني. عشان انت لما تتكلم في كذا موضوع على نفس القناة المشاهد بيتشتت ومش بيبقى عارف انت بتتكلم عن ايه. وكمان بيبقى صعب تصنيف المحتوى.

وانا مثلا لو بدور على محتوى انيمى هدور على قناة متخصصة في الانيمى مش هبقى بدور على شخص له اهتمامات كتير ومن ضمنها الانيمى. التفصيلة دي صغيرة بس بتفرق. بس بردو كل واحد على حسب اهدافه، انت لو مش عايز تتخصص في موضوع معين وعايز تعمل ميكس براحتك بردو طالما بيجيب تفاعل وعاجب جمهورك خلاص استمر.

انا بتكلم لو حد حابب يعمل brand متخصصة في حاجة معينة ويبني حواليها جمهور متفاعل، نظريا، لازم يعمل المحتوى بتاعه عن موضوع واحد وميتكلمش في 500 موضوع. انت لو شوفت المحتوى على قناتي هتلاقي جايب حاجة من الشرق ومن الغرب عشان انا كنت بتكلم عن اي حاجة عاملة ترند بس لما فكرت لقيت ان كنت هكبر اسرع واحقق نتائج احسن لو كنت ركزت على موضوع واحد من الاول.

5. 5. كل ما تتكلم اكتر كل ما تبيع اكتر، اعمل محتوى كتير بس متضحيش بالجودة

اي وقت في ملايين الناس بيستخدموا موقع التواصل الاجتماعي وكل شوية صناع المحتوى بيعملوا محتوى كتير في الساعة. دلوقتي حالا في ناس عمالين يصنعوا وينشروا محتوى كتير جدا وفي ناس كتير جدا بيستهلكوا المحتوى ده. وده على مدار ال24 ساعة. انا عايز اقول ان كل محتوى له مستهلك. انت لو فضلت 24 ساعة تعمل محتوى وتنشره بردو هتلاقي حد يستهلكه. ودي ميزة وعيب في نفس الوقت.

لأن انت عايز تعمل كم مهول من المحتوى وفي نفس الوقت تركز جدا في كل كلمة بتقولها. يعني لازم المحتوى يكون جودته عالية جدا. يعني انت لو عايز تسوق المنتج بتاعك لازم تنشر 5 او عشر بوستات على جميع المنصات. لان اصلا المحتوى كتير مبيخلصش وكل ما تكون نشيط اكتر كل ما هتلاقي تفاعل اكتر وهتكبر اسرع.

بس هنا المشكلة ان مينفعش تنشر اي محتوى عشان في صناع محتوى كتير بيعملوا اي محتوى سد خانة ويقولوا انا نشرت المحتوى ليه مفيش تفاعل. مهم جدا تركز على جودة المحتوى. انا عندي اقعد ساعتين اشتغل على المحتوى بدل ما افضل انشر محتوى ملوش معنى عشرين مرة. ليه؟ عشان المحتوى القليل الحلو هيعمل تفاعل اكتر بكتير من المحتوى الكتير بس جودته وحشة.

واصلا ده هينعكس على مصداقيتك وثقة الجمهور فيك، لو بتعمل محتوى كتير وجودته عالية يبقى انت كده في السليم وهتفضل في السليم. بس لو مرة عملت محتوى حلو ومرة محتوى وحش مش دايما هتلاقي تفاعل مستمر.

وفيه حاجة مهمة طبعا زي انك كل ما تتكلم اكتر كل ما تبيع اكتر. يعني انت كل ما تعمل محتوى كتير وكبير كل ما هتوصل لناس اكتر وتقنع ناس اكتر. احسن ما تعمل محتوى قليل ميوصلش لحد. وكمان انت لما تنشر عشر مرات في اليوم هتزيد فرصك انك تظهر اكتر. انت كده كده مش كل المحتوى اللي بتعمله هيوصل لكل واحد من جمهورك. فكل ما تنشر اكتر كل ما هتظهر اكتر.

بس متشتغلش بالك بحاجة تانية. لو مش هتقدر تعمل محتوى كتير على الاقل المحتوى اللي تعمله اعمله بمزاج مش اي حاجة. المواقع مليانة محتوى زي قلته ودي فرصتك انك تتميز انت لو ركزت شوية في المحتوى اللي بتعمله هتكون احسن من 90% من الناس اللي بينشره من غير وعي ولا تفكير وبالتالي المحتوى بتاعك هيتميز. بس انت ابذل شوية مجهود.

وللحديث بقية.