كيفية طرد حالة العفرتة من حياتك من اجل حياة افضل

 

According to Oxford Dictionary, "Goblin Mode" is the word for 2022

هل بتعاني من الكسل والخمول والنوم المتقطع؟ هل بتعمل حاجات غلط عشان تستمتع بحياتك بغض النظر عن العواقب؟ طيب، هل انت بتكسر قواعد المجتمع وانت قاصد عشان مبقاش فارق معاك حاجة؟

الاوصاف دي هي تعريف لحالة العفرتة Goblin Mode في قاموس اوكسفورد. واللي اختارها الناس عشان تكون المصطلح الاكثر شيوعا لسنة 2022 متفوقة على مصطلح الميتافرس.

حالة العفرتة دي كانت نتيجة طبيعية للعزلة الاجتماعية أثناء الجائحة والأوبئة المنتشرة. بالتالي، انت دخلت حالة العفرتة من غير قصدك وبقيت حاسس بعدم جدوى أي شيء وانك دايما تعود لنقطة الصفر. فبقيت تعمل كل الحاجات اللي قلت مستحيل تعملها. بقيت الشخص اللي انت قلت مستحيل تبقى زيه.

القليل من العفرتة لا يضر. بالعكس، العفرتة مطلوبة عشان تفصل من زحمة الحياة شوية. بس لو الحالة دي طولت، هتقلب بمشاكل كتير. زي انها هتأثر في ثقتك في نفسك، هتزعل الناس منك، وهتجبلك البواسير. لأ بهزر، بس فعلا مع الوقت هتلاقي نفسك الشخص غريب الاطوار زي Wednesday والناس كلها بتتجنب تتكلم معاك.

لحسن الحظ، في عالم جديد بيتخلق، و فكر جديد، واسلوب حياة جديد. ودي فرصتك انك تتغير للاحسن عشان تكون مع العالم الجديد ده. وفي حاجات ممكن تعملها عشان تخرج من حالة العفرتة وتبقى طبيعي متناغم مع العالم الجديد من غير ما تبقى طماع، وكسول، وعندك لا مبالاة.

اولا: أول ساعة في يومك بتحدد باقي يومك هيبقى عامل ازاى، استغلها صح

90% من الناس بيصحوا متأخر ومستعجلين انهم يجروا على الشغل او الجامعة. انت عايز تبقى العكس، تبقى من ال10% اللي بتصحى بدري وتخطط يومها. وعشان اوضح اكثر هاخد مثل من كتاب نادي 5 الصبح لروبين شارما. في الكتاب ده المؤلف يتكلم عن تركيبة 20\20\20. 

وهي انك تعمل تمرينات بسيطة لمدة 20 دقيقة، بعدين تقعد في هدوء أو تعمل Guided Meditation لمدة 20 دقيقة، بعدين تقعد 20 دقيقة كمان تنشط مخك بالقراءة عن موضوع بتحبه. الحاجات دي بتجهز مخك وجسمك عشان تكون نشيط باقي اليوم. الساعة اللي بتخصصها لنفسك لما العالم كله يكون نايم بتديلك طاقة جبارة لأنك صاحي بدري وفايق ومستعد تتحكم على يومك. الصحيان بدري في حد ذاته مش هو اللي يخرجك من حالة العفرتة، لكن استغلالك الساعة الصبح هو اللي بيفرق.

ثانيا: اخرج بره القوقعة واختلط بالناس شبهك

حالة العفرتة بتخليك شايف الناس كأنهم كلهم ضدك ومش متفقين معاك. بس مهما انت كنت تفكيرك غريب، هتلاقي ناس بتفكر زيك. يمكن مش هتقدر تشوفهم وتقابلهم في الواقع إلا لو كنت محظوظ، بس تقدر تلاقيهم اونلاين. جرب تدخل على Space في تويتر وتشارك الناس برأيك أو حتى اسمع بس كأنك دبانة على الحيطة. تطبيق Clubhouse كمان في غرف محادثة عن كل المواضيع.

هيبقى سهل انك تلاقي ناس شبهك في التفكير. مجرد التواصل الاجتماعي ده بيشحنك حتى لو كنت انطوائي. وممكن كمان تطلع على افكار غير افكارك وناس بتتكلم في مواضيع انت مش متفق معاها وده هيوريك قد ايه الحياة مختلفة عند الناس. بس الاحسن انك تشترك في مجموعة مناسبة لك وتتكلم معاهم وهتلاقيهم بيساعدوك تخرج من العفرتة.

ثالثا: اخرج في date مع نفسك وهتلك هدية

حتى لو معندكيش اصحاب فى الواقع تخرج معاهم، ده ميمنعش انك تخرج لوحدك. الخروج ده هو المصل اللي بيزود مناعتك ضد الغرق في حالة العفرتة. حتى لو هتخرج ساعة واحدة في الاسبوع او خروجة واحد في الشهر هتفرق معاك جدا. ادي نفسك فرصة انك تخرج من القوقعة وتشوف دنيا تانية. مجرد تواجدك في مكان مختلف عن اللي انت متعود عليه يشحنك ويخرجك بسهولة من العفرتة.

رابعا: اهتم بترتيب وتنظيف بيتك

الفوضى الخارجية بتخلي حالة العفرتة تزيد لانها بتعكس الفوضى الداخلية. بالتالي، لازم تهتم بأنك تعيش جوة بيئة نظيفة ومرتبة قدر الإمكان. حاجات بسيطة زي ترتيب سريرك اول ما تصحى واستخدام معطر للجو ممكن تفرق.

الكلمات الشائعة في السنين السابقة

خامسا: متستعجلش على التغيير

انا عارف انه كليشيه بس التغيير هو سنة الحياة ودوام الحال من المحال. بس لو عايز تتغير وتخرج من حالة العفرتة لازم انت كمان يكون عندك النية وتشتغل عليها. مش كفاية ابدا انك تتمنى التغيير وتحلم به، لازم تشتغل عليه. يعني متستناش الظروف تتغير لوحدها وخليك ايجابي.

التغيير الشامل مش بيحصل من يوم وليلة هو نتيجة تراكمات افعال صغيرة بتتبني على بعض. فمتضغطش على نفسك وتشتغل كتير لفترة قصيرة بعدين ترتاح فترة طويلة. افضل اعمل تغييرات صغيرة بانتظام ومع الوقت هتلاحظ الفرق. فجأة، هتلاقي نفسك اتخلصت من حالة العفرتة وبقت عادي، تفكيرك صافي، وقادر تاخد حياتك في الاتجاه اللي يريحك.

الخلاصة

احنا عايشين في عصر مختلف عن العصور اللي فاتت واللي جاية. الوباء اجبرنا اننا ننعزل عن الحياة اللي اتعودنا عليها، وده رمانا في دوامة العفرتة. بس بشوية مجهود تقدر تسيطر على العفريت وتبقى انسان طبيعي. حاول انك تصحى بدري، تختلط بناس شبهك في التفكير، وتخصص ساعة لنفسك كل أسبوع.

حاول تعيش في مكان مريح نفسيا عشان ده هينعكس على نفسيتك. والاهم من ده كله، انك متستعجلش، اصبر واشغل على انك تعمل تغييرات صغيرة. واحدة واحدة هتلاقي نفسك في مكان أفضل.

لو اعجبك هذا المنشور لا تنسى ان تشاركه مع اصدقائك.