الرقي مش بالرفاهيات، الشكل، ولا الاتيكيت. المظاهر اكيد مهمة بس مش هي كل حاجة.
الرقي بالاخلاق في تصرفاتك مع الناس وتعاملك مع نفسك.
هاي يا جماعة، المقالة دي عن 10 حاجات الناس الراقية مش بتضيع وقتها عليها.
لو عايز تبقى باشا (او هانم) وتثير اعجاب الناس وحبهم بدون مجهود طبق هذا الكلام في حياتك. وانا اضمنلك انك لو عملت الحاجات دي هتلاقي نفسك في حتة تانية خالص في حياتك الاجتماعية مع الناس حوالين منك.
يالا بينا نبدأ!
1. الاشاعات
الشخص الراقي مش بيضيع وقته في الكلام عن خصوصيات الناس.
ملوش لازمة الكلام، ومعظم الوقت، كل اللي بتعمله هو انك بتتكلم وحش عن حد من ورا ضهره وميقدرش يقول وجهة نظره.
الشخص الراقي بيفضل انه يتعاطف مع الناس بدل ما يصدر احكام عليهم.
الناس الراقية مش بيحبوا القيل والقال، وبيشغلوا اوقاتهم انهم يشتغلوا على نفسهم وتحقيق الاهداف اللي حددوها لنفسهم.
وكمان الشخص الراقي فاهم ان حياة الناس الشخصية متخصهوش في حاجة. ومن ناحية تانية، الشخص الراقي مش مهتم بالاشاعات اللي بتطلع عليه. يعني مش لازم تضيع وقتك في تفسير نيتك وشرح تصرفاتك وتوضيح وجهة نظرك لان كده كده اللي شايفك وحش وغلطان هيسمع كلامك بناء على اللي هو مصدقه عنك.
2. المنظرة
الناس الراقية مش بيخشوا في مقارنات عشان يشوفوا من احسن من مين، ومين وضعه الاجتماعي اعلى من التاني، ومين عنده فولورز اكتر على انستجرام.
الناس الراقية مش بتمشي تتمنظر على الناس ويستعرضوا ذكائهم ورقيهم.
الناس الراقية فاهمين انهم ميقدروش يتحكموا في آراء الناس فيهم.
يعني انت مهما قلت وعملت مش هتقدر تدخل جوة راس الناس وتخليهم يقرروا انهم يحبوك او يحترموك.
وعشان كده الناس الراقية مش بتضيع وقت في القلق عن رأي الناس فيهم.
3. تغيير شخصيتهم على هواء الناس
الناس الراقية مش مهتمين بتأييد الناس ليهم.
اهم مميزات الرقي هي انك تقدر تقبل نفسك تماما من غير دعم خارجي. يعني تعرف مميزاتك وعيوبك وانجازاتك واخفاقاتك وتتقبلهم وتشتغل على نفسك.
الناس الراقية بيحبوا نفسهم بمميزاتهم وعيوبهم ومش مستنيين ان حد يجي من برا يديهم التأييد ده.
وغير كده، هم عارفين وفاهمين نفسهم كويس قوي لدرجة انهم مش بيحسوا باحتياج انهم لازم يتابعوا الترندات عشان الناس تقبلهم.
الناس الراقية مش بيقلدوا الموضة الرايجة لأن هم اللي بيصنعوا الموضة.
بس خد بالك انهم مش بيبذلوا مجهود كبير لانهم اصلا مش مهتمين بشعبيتهم ومدى تأثيرهم.
4. محاولة انهم يبقوا زي كل الناس
لو عايز تعيش حياة تعيسة؟ حاول انك تfit in او انك تبقى واحد من الناس زي كل الناس.
ميزة الشخص الراقي هي القدرة انه يبقى صريح مع نفسه ويعمل اللي في دماغه في حدود العادات والتقاليد في المجتمع.
ولو ده معناه انه يعوم ضد التيار، فهو مش هيفرق معاه. لانه فاهم انه لو قبل بالنمط اللي الناس بتفرضه عليه هيتحول لمسخ من شخصيته الحقيقية.
الشخص الراقي بيفضل انه يكون صادق مع ذاته ويعبر عن نفسه بالطريقة اللي تريحه بدل ما يكرر نفس الكلام اللي كل الناس بتقوله.
وده معناه ان الشخص الراقي فاهم نفسه كويس قوي ومش محتاج حد من بره يجي يفهمه حاجة لانه بيفضل سلامته النفسية على كلام الناس عنه.
سهل يقطع علاقة متعبة من غير ندم ومش بيسمح لحد انه يستغل عيوبه ضده.
ومش بيخبي حاجة لأنه عارف نقطة قوته وضعفه وكل حاجة.
5. الانغماس في عادات سيئة
سلوكك هو العلامة الاساسية اللي بتبين قد ايه انت راقي.
يعني الشخص الراقي ممكن ينشر اخباره على السوشيال ميديا بس مش ممكن ينشر حاجات خاصة جدا عن حياته عشان يظهر الرقي.
الناس الراقية دايما بيركزوا في كل تصرفاتهم عشان مش عايزين ياخدوا قرارات يندموا عليها بعد كده.
الرقي مش معناه انك تنغمس في عادات سيئة تضر بصحتك وسمعتك.
ولما بتكلم عن العادات السيئة بقصد كمان العلاقات المدمرة.
الناس الراقية مش بيتحملوا التعامل الوحش وبيقدروا يحطوا حدود.
وده بينطبق على العلاقات المهنية والرومانسية والصداقات.
وغير كده الناس الراقية عندهم قدرة عجيبة على التعافي بسرعة غريبة من العلاقات السامة.
6. الرغي الكتير
بعض الناس بيحبوا يتكلموا كتير عشان بيحاولوا يثبتوا نفسهم للناس حواليهم.
بس في الحقيقة، كل ما تكون راقي واثق من نفسك كل ما تحس انك مش لازم تثبت نفسك لحد.
الناس الراقية مش بيحاولوا يسيطروا على المحادثة ولا يوجهوا الكلام في اتجاه معين، لأنهم معندهمش مشكلة انهم يتكلموا في مواضيع مختلفة.
وبينتهزوا اي فرصة عشان يسيبوا الشخص التاني يتكلم لان كده ممكن يتعلموا حاجة جديدة.
7. اذية البشر
الناس الراقية مش بيتآمروا عشان ياخدوا اللي هم عايزينه.
ولو حصل واتعدوا حدودهم بيعتذروا بسرعة. يعني لو حسيت انك خدعت حد او ضللته لازم تعترف بغلطتك وتصلحها بسرعة.
اذية الناس بتضيع الوقت وبيظهر انك مش بتحترم الشخص التاني. ولو حد اذاهم بينسحبوا بهدوء ويسيبوا عدالة السما تاخد مجراها.
لما الناس التانية بيعوزوا حاجة، ممكن يكذبوا ويخدعوا الناس عشان ياخدوا منهم الحاجة دي.
لو احتاجوا حاجة، ممكن يحسسوك بالذنب، ويقولوا ان الناس التانيين عايزين يساعدوهم.
بس لو الشخص الراقي احتاج لمساعدة، بيطلبها مباشرة وبكل صراحة.
لأنهم عارفين ان الصراحة راحة وبتقلل الحيرة وتزود الثقة.
8. التفاخر بانجازاتهم
سواء في كلامهم مع الناس او منشوراتهم على مواقع التواصل الاجتماعي، الناس الراقية مش بتتفاخر بالانجازات.
لما بقول انجازات بقصد كمان المشتريات الفخمة والمصاريف.
الناس الراقية بيفضلوا ينشروا تحديثات عن تقدمهم مش عن انجازاتهم وده عشان يلهموا الناس مش يتمنظروا عليهم.
مش بيحسوا انهم لازم يتمنظروا بممتلاكاتهم لانهم مش بيحاولو اثارة اعجاب الناس. لانهم واثقين في نفسهم ومش محتاجين تأييد خارجي.
9. التحكم في المحداثات
الناس الراقية مش مهتمين بالناس اللي مش بيتكلموا غير عن نفسهم واهتمامتهم.
وده مش معناه انهم بيحسوا بالملل، اظن ان الناس الراقية عارفين كويس قوي ان الكلام عن نفسك زيادة عن اللزوم بيقلل من جودة من المحادثة.
يعني الكلام عن نفسك ممكن يضيع فرصة كبيرة انك تعرف اكتر عن الشخص اللي قدامك.
الشخص الراقي بيسمع وبيقرا بين السطور وبيسأل اسئلة حلوة وبيبص في عينيك وانت بتكلمه، وده بيخلي الشخص اللي قدامه يفتحلك قلبه.
وبعد ما تخلص كلامك، بيبدأ الشخص الراقي يشاركك اراه.
والناس الراقية مش من النوع اللي بيستخدم التليفون لما يكون بيتكلم مع حد.
ومش بيبص بعيد لما حد يكلمه.
لما تيجي تتكلم مع حد، اديله كل اهتمامك وحسسه انه اهم شخص في الوجود.
10. التفكير في حاجات خارج سيطرتهم
في الاول والاخر، الناس الراقية مجرد بشر.
ومدركين انهم ممكن يغلطوا، وساعات حتى لو بذلوا اقصى مجهود مش ضمانة انهم يوصلوا لاهدافهم.
ببساطة كده في حاجات خارج نطاق سيطرتك وده طبيعي.
الفرص مبتخلصش لو استغليت وقتك صح وبقيت منتج ودورت عليهم في الاماكن الصح.
الرقي مش معناه انك انسان خارق عندك مناعة ضد الفشل.
حتى الاشخاص اللي عندهم رقي كبير ممكن يواجهوا مشاكل ميقدروش يحلوها. فمتفكرش كتير، واتعلم وكمل.
الرقي بيدور حوالين طريقة تعاملك مع الحاجات الحلوة والوحشة في الحياة. فلما تكون راقي بتعرف ازاي تتعامل مع النجاح والاخفاقات.
الخلاصة
الرقي ده مزيج من الحس الجمالي والاخلاق ومش معناه انك ارستقراطي ومش معناه كمان انك تتنازل عن حقك بالعكس انت بتعمل اللي عليك. الرقي شقه الجمالي انك مظهرك مريح للعين وشقه الاخلاقي انك التعامل معك سهل وبوش واحد. وانا اللي يعرفني على الحقيقة عارف اني عربجي بالسنس. بس عندي طموح للرقي وبحاول وساعات بنجح وساعات بفشل ده مش معناه اني منافق بقول كلام وبعمل عكسه. احنا بنحب الزمن الجميل عشان كان في رقي واهتمام بالتفاصيل. فانت ممكن تبقى محظوظ وورثته من جدك التركي وممكن تبقى على الله حكايتك. وهو في الاول والاخر انت اللي بتختار. وفي نهاية المقال اتمنى تكون استفدت حاجة جديدة النهاردة.
لو اعجبك هذا المقال شاركه مع اصدقائك
Comments
Post a Comment