تجربتي مع الشقق المفروشة


ناس كتيرة بتسألني انت فين و بطلت تكتب ليه؟ الحقيقة هي اني عمري ما بطلت كتابة, و بكتب علي مدونات تانية لا تعلموها, انا عندي اكتر من مدونة و مش معني اني بقالي كتير مكتبتش علي مدونتي هنا اني مش بكتب, بس انا حابب اكتب علي المدونة دي عشان فعلا بقالي كتير منشرتش حاجة عليها. و موضوع المدونة دي هي ازاي اني نجحت انفصل عن اهلي و اعيش لوحدي في شقة مأجرها لحسابي الخاص, وهكلمكم عن تجربتي الشخصية يمكن تستفادوا حاجة.

شباب كتير عايز يتغير مش لاقي حلمه ونفسه يعبر.

اكيد في ناس كتير عايشين مع اهلهم و نفسهم يعيشوا في شقة لوحدهم. انا عايش الحلم. بس الحكاية مش بالبساطة دي, لما تبقي عايش لوحدك بتبقي عليك مسئوليات كتيرة و اهمها انك تدفع الايجار في ميعاده, ولو حظك وحش ممكن تتعامل مع ناس يستغلوك خاصة لو اول مرة تأجر و غير كدة بتهتم بنظافة المكان, وتتعلم الطبخ و الغسيل و الذي منه.

الحكاية ابتدت يوم رأس السنة لما سبت البيت و انتقلت الي العالم الخارجي, انا كنت بفكر كتير اسيب البيت عشان كنت حاسس ان وانا نايم اهلي كانوا بيتدخلوا في حياتي يفتحوا الموبايل و الكمبيوتر و يدخلوا في احلامي. المهم, لما سبت البيت روحت الهرم ادور علي شقة اسكن فيها و اكيد ملقتش لأن الوقت كان متأخر, نزلت وسط البلد ادور علي فندق اعقد فيه لحد ما افكر هعمل ايه, اليوم ده فضلت طول الليل ادور علي اي فندق لحد ما لقيت فندق قعدت فيه يومين, اهلي كانوا خدوا مني اللابتوب واشتريت لابتوب جديد.

المهم, دورت علي شقة و لقيت غرفة للايجار في شقة كويسة, وكانت رخيصة, ولميت شنطي وحاجاتي ونزلت عشان اروح الشقة لكن لقيت سواق تاكسي ابن حلال خلاني اسيب الغرفة و اجر شقة, الكلام دا انتو عارفينوا بس استني عشان التقيل جاي. المهم اخدت شقة و قعدت فيها نص شهر, ولما المدة خلصت رجعت تاني للغرفة, وكان في ناس في الشقة بصراحة مرتحتيش فيها مع انها كانت كويسة, قعدت فيها شهر بعد كدة دورت علي شقة جديدة اسكن فيها لوحدي, هي الشقة الي انا قاعد فيها دلوقتي.



بس للاسف, هي الشقة واسعة و كويسة وانا عايش فيها لوحدي بس المنطقة مش نضيفة. المهم عندي انها شقة لي لوحدي بس في مشاكل قابلتني. انا اجرت الشقة دي عن طريق مكتب عقاري, لكن صاحب الشقة ظلمني وخلاني اكتب عقد مفهوش ولا ميزة لي مع اني كنت كاتب العقد الاول كويس و هو كل شوية يرجع في كلامه معايا, وكمان عمال يدخل الشقة وانا مش موجود فيها, وانا سايب كل حاجة في الشقة طب هعمل ايه, حتي وانا نايم بيدخل الشقة ومش عارف هو بيعمل كدة ليه

المهم انا دلوقتي ساكن لوحدي في الشقة و الشقة مزعجة بجد, بس الحاجة الكويسة اني بشتغل اكتر من الاول و حاسس اني مسؤول عن نفسي, واحدة واحدة هقدر اكبر اكتر و اعيش حياة مريحة مع الوقت, انا متأكد اني هقدر اعمل كدة علي الاقل دلوقتي مفيش حد فوق دماغي طبعا غير صاحب الشقة الي هو اصلا كل شوية يرجع في كلامه و يقول حاجة وينفذ عكسها. المهم لو عايز تأجر شقة و تكون عايش مع نفسك, اتأكد الاول ان الي هتأجر منه اهل ثقة و مش هيظلمك.


انا خلاته يكتب العقد علي مزاجه عشان انا مكنتش عايز اظلمه لكن هو الي ظلمني و انا دلوقتي مربوط بالعقد المكتوب. فعلا في ناس لو ادلتها شبر هياخده دراع, فخلي بالك وانت بتأجر شقة خاصة لو شقة مفروشة وانت ناوي تقيم فيها فترة طويلة. علي العموم انا لسة مكملتش اول شهر و مش عارف الايام الجاية مخبية ايه, بس انا مركز في شغلي عشان هو اهم حاجة في حياتي دلوقتي

و انا من موقعي هذا برحب بأي شخص حابب يزورني في بيتي المتواضع, وعلي فكرة انا مش بفكر ارجع البيت او ادور علي شقة جديدة لأني كدة مرتاح و غير كدة انا عرفت الي فيها و النقل لمكان جديد متعب و انا اتأقلمت مع الوضع الحالي و شوية شوية هتأقلم. ونصيحة انسانية لو فاكر انك لما تسيب اهلك و تسكن لوحدك هترتاح فكر تاني لأن فعلا في مميزات بس برضه في مسؤليات يعني لازم يبقي نفسك طويل و بتعرف تتعامل مع الناس وتعرف تحافظ علي حقوقك

بالتوفيق و النجاح للجميع

لو عجبك الكلام ده اعمل شير للبوست عشان صحابك يستفادوا, انا معنديش صحاب اعملهم شير و محدش بيزورني و قاعد بكلم الحيطان طول الوقت و الحيطان ليها ودان فلو انا مزعلك في حاجة عادي ممكن اصالحك بس زوروني كل سنة مرة حرام تنسوني بالمرة

سلاموز

Comments

Popular posts from this blog

Will Social Media Make Us Immortal?

This Instagram Trick Will Double Your Engagement!

How to Write the Title for Your Blog Post Like a Pro Copywriter